SUZHOU, China --- Kasama ng 11 pang mga taga-media sa Pilipinas na inimbitahan ng China’s Foreign Ministry, pumunta kami sa “Humble Administrator’s Garden”.
May isang lugar sa napakaganda at lumang garden na ito (1509) kung saan makikita ang North Temple Pagoda, isa sa pinakalumang pagoda sa Suzhou.
Hindi kasama ang North Temple Pagoda sa Humble Administrator’s Garden.
Magkalayo nga sila ngunit pinag-isipan ng nagdisenyo ng lungsod ng Suzhou na mga opisyal na mula sa garden makita ang pagoda.
Nag-usap nga kami ni Willard Cheng ng ABS-CBN, “Ibang-iba talaga itong mga Intsik magpahalaga ng kanilang kasaysayan.”
Siyempre ang nasa isip namin, ang photo bomber na Torre de Manila na sinira ang view ng monumento ni Gat Jose Rizal.
Sinabi sa amin ng opisyal ng Suzhou Foreign Ministry na ang North Temple Pagoda na 1,700 taong gulang na ay 72.6 metro ang taas.
Ang pagoda ay templo para sa kanila.
May regulasyon silang sa loob ng 14 na kilometro sa apat na bahagi ng Pagoda ay hindi maaaring magpatayo ng gusali na mas mataas pa. Kaya kitang-kita ang Pagoda.
Iba naman sa Pilipinas. Ang pamahalaan pa ng Manila ang katulong sa pambabastos sa monumento ni Rizal.
Ang 49-storey na Torre de Manila ang makikita sa likod ng monumento ni Rizal na hindi yata aabot sa 20-storey ang taas.
Ngayon, kung anu-anong solusyon ang pinag-iisip. Takpan daw ang painting. Paikutin daw ang monumento ni Rizal.
Bakit hindi na lang ‘yan buwagin at ikulong ang mga opisyal na sangkot sa pambabastos ng ating kasaysayan?
Dito naman sa Suzhou, nakakatuwa ang pangalan sa English ng makasaysayang hardin. Ang ibig sabihin kasi ng ‘humble’ ay mapagkumbaba.
Tanong ko sa aming guide, bakit may administrator bang mayabang?
Ang paliwanag niya, kaya raw ganun ang tawag nila, dahil ang garden na napakalawak (5.2 ektarya) sa bandang hilagang silangan ng lumang lungsod ng Suzhou ay pahingahan dati ng isang prominenteng personalidad, si Imperial Inspector Wang Xianchen, nang siya ay mag-retire sa serbisyo. Ganun pala.
Ang Suzhou ay isang progresibong lungsod sa silangan ng China. Malapit sa Shanghai.
Ang kanilang pinagmalaki ay ang Industrial Park ka-partner ang Singapore.
Ang isa sa ginagawa roon ay ang Higer bus na gamit ng ilang bus company sa Pilipinas katulad ng Victory Liner, All Star. Nakabenta rin sila sa Iglesia ni Cristo ng mga 100 bus.
Itong media visit ay inorganisa kasabay ng ika-40 taong pakikipagrelasyon ng Pilipinas at China.