Tinawag na ‘catastrophe’ ni Supreme Court Senior Associate Justice Antonio Carpio kung babawiin umano ng Pilipinas ang naumpisahan na nitong arbitration case laban sa China kaugnay sa West Philippine Sea kaya naman hinamon nito ang presidential aspirants ngayong 2016 election na magkaroon ng malinaw na posisyon sa nasabing usapin.
Ani Carpio, hindi masama kung makipag-usap man ang susunod na pangulo ng bansa sa China ukol sa nasabing isyu ngunit kung iwi-withdraw ang kaso ay malaking problema ang hatid nito.
“If a new president comes in and the case is still going on, there’s nothing wrong with talking to China. What’s wrong is if the case is withdrawn. That would be catastrophic,” pahayag ni Carpio sa isang forum sa Quezon City.
Ipinaliwanag ni Carpio na mahalaga ang arbitration case na sinimulan ng Aquino administration, sa battlefield umano ay hindi kayang talunin ng maliit na bansa gaya ng Pilipinas ang China ngunit sa legal battle ay mayroon itong malaking puntos.
Ayon kay Carpio sa ilalim ng United Nations Convention on the Law of the Sea (UNCLOS), pinapayagan ang negosasyon o amicable settlement kahit pa man ongoing ang paglilitis sa West Philippine Sea.