P838.497 Milyon Inilaan sa Pagpapatupad ng mga Programa ng Pangasiwaan ng Niyog sa Pilipinas (PCA)
Ibinalita ni PCA Administrator Euclides G. Forbes na naglaan ang Department of Budget and Management (DBM) at ang Kagawaran ng Pagsasaka ng halagang P838.497 milyon para sa pagpapatupad ng mga programa ng PCA. Ang halagang P502.310 milyon ay inilaan para sa malawakang pagtatanim at muling pagtatanim ng niyog samantalang ang P336.187 milyon ay inilaan naman sa programa sa pag aabono. Ayon kay Administrator Forbes, ang halagang inilaan sa pagpapatupad ng programa ng PCA ay maituturing na pinakamalaki matapos ang pagpapatupad ng Small Coconut Farms Development Project (SCFDP) na pinonduhan ng World Bank noong 1992-2000. Para sa taong 2012, layunin ng PCA na mataniman ang 138,125 ektarya sa buong Pilipinas sa pamamagitan ng pagpapatupad ng Accelerated Coconut Planting and Replanting Project (ACPRP) na kinapapalooban ng mga sumusunod: A) Participatory Coconut Planting Project (PCPP) − ito ay ang sistema ng pagpapatupad sa pamamagitan ng pagbibigay ng insentibo sa halagang P31.40 bawat puno o P3,140 bawat ektarya sa mga magniniyog na lumalahok sa programa at matagumpay na nakapagpapatubo at nakapag lilipat ng punlang niyog sa kundisyong ang mga lumahok na magniniyog ay mayroong pagkukunan ng niyog na pananim at mayroong lupang angkop na pagtataniman ng niyog. B) Coconut Seedlings Dispersal Project (CSDP) − Pamamahagi ng Punlang Niyog − ito ay ipatutupad sa pamamagitan ng pakikipagso-syo sa mga pribadong sektor at iba pang kagawaran ng pamahalaan tulad ng Department of Social Service and Development (DSWD), Local Government Units (LGUs), Non-Government Organizations (NGOS), National Commission on Indige-nous People ( NCIP) para sa pagtatatag ng seedfarms.